Páginas

domingo, 26 de mayo de 2013

REMATAMOS

Este caderno de bitácora dixital empezaba a súa andadura en xullo de 2010. En xaneiro de 2009 durante a presentación do libro, Ramón Cabanillas Enríquez, biografía en imaxes editado por Candea, Adela Leiro e eu mesma anunciamos ao público que asistiu que tamén nos implicariamos na conmemoración do aniversario da morte de Asorey como xa fixeramos coa de Cabanillas. Este blog naceu polo tanto como un lugar na rede onde atopar información sobre o artista, cousa que neses momentos era practicamente inexistente. E creo que cumpriu a súa función, dado que os colexios de Cambados que colaboraron na homenaxe e os veciños e veciñas de Cambados en xeral (creo que o blog non tivo difusión moito máis alá) seguiron con interese a información que aquí se poñía e modestamente penso que lles axudou a coñecer un pouco mellor ao seu veciño.

Outra motivación que tiven para abrir esta páxina estivo no feito que me pareceu que o legado de Asorey estaba bastante esquecido e numerosas obras súas en risco de perderse. Afortunadamente ese ano de homenaxes permitiron a moita xente empezar a valorar na súa xusta medida a este grandísimo artista.

Ultimamente entereime pola prensa de que a familia Asorey constituiu unha Asociación Cultural coa idea de promover a figura de Asorey e axudar á conservación da súa obra. É por iso que penso que continuar con este blog quizais xa non teña sentido, xa hai outros que con máis lexitimidade ca min se van ocupar de resaltar a importancia do noso escultor.

Remato dando as grazas a tod@s @s que me seguiron con interese e pedindo disculpas por se alguén se sentiu ofendido polos comentarios que fixen,

Unha aperta e ata pronto.


(A familia abriu unha páxina web, podedes acceder a ela  dende este enlace)

lunes, 12 de julio de 2010

EMPEZAMOS UN NOVO BLOG

Retrato de Francisco Asorey por Pacheco. Arquivo Pacheco,Vigo.


Hoxe empezamos un novo blog. O 2 de xullo do próximo ano 2011 cumpriranse 50 anos da morte do escultor cambadés Francisco Asorey. Este blog pretende ser unha homenaxe e tamén unha fonte de información e imaxes para os que queiran achegarse á súa figura.